Merci viu Mau Hubi

Liebe Peter/Hubi

Jitze isch es leider gli e so wyt, Du gisch numme no es paar Tag Schuel im Wyde.

Mir, u vorauem üser beide Modi hei Dini Art z’ungerrichte, immer sehr gschetzt, beidi si immer gärn zu Dir i Ungerricht cho.

Leider git’s hüt numme no wenigi Lehrer wi Di, wo Ching würklech gärn hei u wüsse, wie me se für öppis cha begeischtere u motiviere.

Du hesch ihne o chönne Sache mit uf e Läbenswäg gä, wo nid im Lehrplan schtöh, aber mindeschtens grad so wichtig für d’Zuekunft wärde si, u das finge mir beidruckend.

Danke wei mir Dir aber o für die unvergässleche Erläbnis u Erfahrige, wo Du ihne ermöglecht häsch. Mir dänke da zum Bispiu a Schuelreise, Landschuelwuche, Bade- u Schlöflischtunde ir Hofmatt, Dorf- u Schtadt-OL’s oder wie öies Klassezimmer mit em Aquarium u em Sitzegge igrichtet gsi isch.

Mir wünsche Dir u er Beatrice uf öiem 3. Läbensabschnitt jitze aues Guete, viu Glück u wyterhin viu Gsundheit.

Ganz liebi Grüess:-)

vor Ramona, dr Claudia, dr Monika u em Wöufu 
vom Ballebüehlwäg